AI ခေတ်စားလာမှုကြောင့် ဒေတာစင်တာတွေရဲ့ ကာဗွန်ထုတ်လွှတ်မှု မျှော်မှန်းထားတာထက် ၅၇ ရာခိုင်နှုန်း ပိုမိုမြင့်တက်လာနိုင်
<p>Allianz Trade ရဲ့ အစီရင်ခံစာသစ်တစ်ခုအရ ၂၀၂၅ ခုနှစ်မှာ ကမ္ဘာတစ်ဝန်းက ဒေတာစင်တာတွေဟာ ကာဗွန်ဒိုင်အောက်ဆိုဒ် မက်ထရစ်တန်</p>
Allianz Trade ရဲ့ အစီရင်ခံစာသစ်တစ်ခုအရ ၂၀၂၅ ခုနှစ်မှာ ကမ္ဘာတစ်ဝန်းက ဒေတာစင်တာတွေဟာ ကာဗွန်ဒိုင်အောက်ဆိုဒ် မက်ထရစ်တန် ၂၈၆ သန်းအထိ ထုတ်လွှတ်ဖွယ်ရှိနေပြီး ဒါဟာ အပြည်ပြည်ဆိုင်ရာ စွမ်းအင်အေဂျင်စီ (IEA) ရဲ့ ယခင်ခန့်မှန်းချက်ထက် ၅၇ ရာခိုင်နှုန်းခန့် ပိုမိုမြင့်မားနေပါတယ်၊၊
အဲဒီလို ထုတ်လွှတ်မှု အရှိန်အဟုန်နဲ့ မြင့်တက်လာတာဟာ ကွန်ပျူတာတွက်ချက်မှုစွမ်းအားနဲ့ လျှပ်စစ်ဓာတ်အား အများအပြား လိုအပ်တဲ့ Artificial Intelligence (AI) နည်းပညာ မြန်ဆန်စွာ တိုးတက်လာတာကြောင့် ဖြစ်ပါတယ်၊၊
လက်ရှိမှာ AI စနစ်တွေဟာ ကမ္ဘာ့ဒေတာစင်တာတွေရဲ့ လျှပ်စစ်သုံးစွဲမှု ၁၅ ရာခိုင်နှုန်းကနေ ၂၀ ရာခိုင်နှုန်းအထိ နေရာယူထားပြီး ၂၀၃၀ ပြည့်နှစ်မှာတော့ အဲဒီပမာဏဟာ ၄၀ ရာခိုင်နှုန်းအထိ ရောက်ရှိလာနိုင်ပါတယ်၊၊
လျှပ်စစ်ဓာတ်အားပေးစနစ်တွေကို သန့်ရှင်းတဲ့ စွမ်းအင်အဖြစ် မြန်မြန်ဆန်ဆန် မပြောင်းလဲနိုင်ပါက ၂၀၃၀ ပြည့်နှစ်မှာ ဒေတာစင်တာတွေရဲ့ ကာဗွန်ထုတ်လွှတ်မှုဟာ ၂ ဆကျော် ပိုမိုများပြားလာမှာ ဖြစ်ပြီး တစ်နှစ်ကို အမေရိကန်ဒေါ်လာ ၁၅၄ ဘီလီယံဖိုးမက ရာသီဥတုဆိုင်ရာ ပျက်စီးဆုံးရှုံးမှုတွေ ဖြစ်ပေါ်စေနိုင်ပါတယ်၊၊
ဒါ့အပြင် ၂၀၃၀ ပြည့်နှစ်မှာ ဒေတာစင်တာတွေရဲ့ အအေးပေးစနစ်အတွက် ရေသုံးစွဲမှုဟာလည်း တစ်နှစ်ကို လီတာ ၁ ဒသမ ၃ ထရီလီယံကနေ ၁ ဒသမ ၈ ထရီလီယံအထိ ရှိလာနိုင်ပြီး အဲဒီပမာဏဟာ ဆွစ်ဇာလန်နိုင်ငံရဲ့ တစ်နှစ်စာ ရေသုံးစွဲမှုနဲ့ ညီမျှနေပါတယ်၊၊
ဒေတာစင်တာတွေရဲ့ သဘာဝပတ်ဝန်းကျင်အပေါ် သက်ရောက်မှုဟာ သူတို့အသုံးပြုတဲ့ စွမ်းအင်အမျိုးအစားပေါ်မှာ များစွာမူတည်နေပြီး ပြန်လည်ပြည့်ဖြိုးမြဲစွမ်းအင် အသုံးပြုတဲ့ စင်တာတွေဟာ ကျောက်မီးသွေးနဲ့ လောင်စာဆီ သုံးစွဲတဲ့ စင်တာတွေထက် ကာဗွန်ထုတ်လွှတ်မှု အလွန်နည်းပါးတာကို အစီရင်ခံစာမှာ ဖော်ပြထားပါတယ်၊၊
