နယူးဇီလန်မှာ အသက် ၁၆ နှစ်အောက် ကလေးတွေ လူမှုကွန်ရက် သုံးစွဲတာကို ပိတ်ပင်မည်
<p>နယူးဇီလန်ဝန်ကြီးချုပ် Christopher Luxon က အသက် ၁၆ နှစ်အောက် ကလေးတွေ လူမှုကွန်ရက်သုံးစွဲတာကို တားမြစ်မယ့်</p>
နယူးဇီလန်ဝန်ကြီးချုပ် Christopher Luxon က အသက် ၁၆ နှစ်အောက် ကလေးတွေ လူမှုကွန်ရက်သုံးစွဲတာကို တားမြစ်မယ့် ဥပဒေကြမ်းတစ်ရပ်ကို လွှတ်တော်မှာ တင်သွင်းသွားမယ်လို့ ကြေညာခဲ့ပါတယ်။ အဲဒီ ဥပဒေကို မလိုက်နာတဲ့ ကုမ္ပဏီတွေအနေနဲ့ သူတို့ရဲ့ ကမ္ဘာတစ်ဝန်း ဝင်ငွေရဲ့ ၁၀ ရာခိုင်နှုန်းအထိ ဒဏ်ရိုက်ခံရနိုင်ပါတယ်။ ပလက်ဖောင်းတွေအနေနဲ့ အသုံးပြုသူတွေရဲ့ အသက်ကို စိစစ်ဖို့အတွက် အကောင့်အချက်အလက်တွေ၊ မျက်နှာမှတ်မိတဲ့ နည်းပညာတွေနဲ့ ဒစ်ဂျစ်တယ် မှတ်ပုံတင်တွေ အသုံးပြုရမှာ ဖြစ်ပါတယ်။
အဲဒီလို တားမြစ်ရတာဟာ လူမှုကွန်ရက်တွေကြောင့် ကလေးတွေရဲ့ စိတ်ကျန်းမာရေး၊ ပညာရေးနဲ့ မိသားစုဘဝတွေ ထိခိုက်နေရတာကို ကာကွယ်ဖို့ဖြစ်တယ်လို့ ဝန်ကြီးချုပ်က ဆိုပါတယ်။ ဒါပေမဲ့ ညွန့်ပေါင်းအစိုးရအဖွဲ့ဝင် New Zealand First ပါတီကတော့ အဲဒီ ဥပဒေကြမ်းကို ထောက်ခံမှာမဟုတ်ဘူးလို့ ပြောဆိုထားတဲ့အတွက် လွှတ်တော်မှာ အတည်ပြုနိုင်ဖို့ မသေချာသေးပါဘူး။ ပါတီခေါင်းဆောင် Winston Peters ကတော့ ကလေးတွေ လူမှုကွန်ရက် မသုံးအောင် တားဆီးဖို့က မိဘတွေရဲ့ တာဝန်သာဖြစ်တယ်လို့ ဝေဖန်ထားပါတယ်။
ပြီးခဲ့တဲ့ ဒီဇင်ဘာလကလည်း ဩစတြေးလျနိုင်ငံမှာ အသက် ၁၆ နှစ်အောက် ကလေးတွေကို TikTok၊ YouTube နဲ့ Facebook အစရှိတဲ့ လူမှုကွန်ရက်တွေ သုံးစွဲခွင့် ပိတ်ပင်ခဲ့ပါတယ်။ အဲဒီလို ပိတ်ပင်ခဲ့တာဟာ လုံးဝကျရှုံးမှုတစ်ခု ဖြစ်တယ်လို့ ဝေဖန်မှုတွေ ရှိနေပေမဲ့ နယူးဇီလန်ဝန်ကြီးချုပ်ကတော့ အဲဒီ အစီအစဉ်ဟာ အရာရာပြီးပြည့်စုံမှာ မဟုတ်ပေမဲ့ မဖြစ်မနေ ကြိုးစားကြည့်ဖို့ အရေးကြီးတယ်လို့ တုံ့ပြန်ပြောဆိုထားပါတယ်။
Ref : Reuters
