ပလတ်စတစ်ဘူးခွံတွေကို အာဟာရပြည့်ဝတဲ့ ကွတ်ကီးတွေအဖြစ် သိပ္ပံပညာရှင်တွေ အောင်မြင်စွာ ပြောင်းလဲ
<p>ပလတ်စတစ်ဘူးခွံတွေကို စားစရာအဖြစ် ပြောင်းလဲပစ်မယ်ဆိုရင် ယုံနိုင်စရာရှိပါ့မလား။ အခုတော့ တောင်အီလီနွိုက်တက္ကသိုလ် ကာဘွန်ဒေးလ် (Southern Illinois University</p>
ပလတ်စတစ်ဘူးခွံတွေကို စားစရာအဖြစ် ပြောင်းလဲပစ်မယ်ဆိုရင် ယုံနိုင်စရာရှိပါ့မလား။ အခုတော့ တောင်အီလီနွိုက်တက္ကသိုလ် ကာဘွန်ဒေးလ် (Southern Illinois University Carbondale) က သိပ္ပံပညာရှင်တွေက ပလတ်စတစ်နဲ့ စိုက်ပျိုးရေးစွန့်ပစ်ပစ္စည်းတွေကို အသုံးပြုပြီး အာကာသမှာစားလို့ရမယ့် ကွတ်ကီး (cookie) နမူနာတွေကို အောင်မြင်စွာ ဖန်တီးလိုက်ပြီ ဖြစ်ပါတယ်။
µBites လို့ နာမည်ပေးထားတဲ့ အဲဒီပရောဂျက်ကို ရိက္ခာရှားပါးလှတဲ့ ခရီးရှည်အာကာသစူးစမ်းလေ့လာရေးတွေမှာ အစားအစာထုတ်လုပ်နိုင်ဖို့ ရည်ရွယ်ပြီး NASA ရဲ့ Deep Space Food Challenge ကနေတစ်ဆင့် အကောင်အထည်ဖော်ခဲ့တာ ဖြစ်ပါတယ်။
ဒီကွတ်ကီးတွေကို ဖန်တီးတဲ့လုပ်ငန်းစဉ်က တကယ့်ကို အံ့သြစရာကောင်းပါတယ်။ ပလတ်စတစ်ကို ဒီအတိုင်း ကြိတ်ထည့်လိုက်တာမျိုး မဟုတ်ဘဲ ရေသန့်ဘူးတွေမှာ အသုံးများတဲ့ PET ပလတ်စတစ်ကို အပင်ထွက်ပစ္စည်းတွေလိုမျိုး စိုက်ပျိုးရေးစွန့်ပစ်ပစ္စည်းတွေနဲ့ အရင်ဆုံး ရောစပ်လိုက်ပါတယ်။ အဲဒီနောက် ရေ၊ အောက်ဆီဂျင်၊ အပူနဲ့ ဖိအားတို့ကို သုံးပြီး အဲဒီစွန့်ပစ်ပစ္စည်းတွေကို ဖြိုခွဲပါတယ်။
အဲဒီကနေတစ်ဆင့် အထူးပြုပြင်ထားတဲ့ တဆေး (yeast) ကို သုံးပြီး အဲဒီပါဝင်ပစ္စည်းတွေကို ပရိုတင်းနဲ့ အခြားအာဟာရဓာတ်တွေ ပါဝင်တဲ့ စားသုံးနိုင်တဲ့ အရာတွေအဖြစ် အသွင်ပြောင်းလိုက်တာပါ။
ရရှိလာတဲ့ ပါဝင်ပစ္စည်းတွေကို အမျှင်ဓာတ်၊ ကစီဓာတ်၊ အချိုဓာတ်တွေနဲ့ ထပ်မံရောစပ်ပြီး 3D ပရင်တာကို အသုံးပြုကာ ကွတ်ကီးတွေအဖြစ် ပုံဖော်ထုတ်လုပ်တာ ဖြစ်ပါတယ်။
ဒါပေမဲ့ ဒီကွတ်ကီးတွေက လက်ရှိမှာ သုတေသနအဆင့် နမူနာအနေနဲ့သာ ရှိနေသေးပြီး ဈေးကွက်ထဲမှာ ဝယ်ယူစားသုံးနိုင်တဲ့ အဆင့်တော့ မရောက်သေးပါဘူး။ သိပ္ပံပညာရှင်တွေက ကွတ်ကီးရဲ့ အရသာ၊ ပုံပန်းသွင်ပြင်နဲ့ အာဟာရတန်ဖိုးတွေကို ပိုမိုကောင်းမွန်လာအောင် ဆက်လက်စမ်းသပ်နေပါတယ်။
ဒီလို ဆန်းသစ်တဲ့ စိတ်ကူးက အနာဂတ်မှာ လနဲ့ အင်္ဂါဂြိုဟ်လို ဝေးကွာတဲ့ နေရာတွေကို သွားရောက်မယ့် အာကာသယာဉ်မှူးတွေအတွက် စွန့်ပစ်ပစ္စည်းတွေကနေ အသက်ဆက်ဖို့ အစားအစာတွေ ထုတ်လုပ်နိုင်မယ့် မျှော်လင့်ချက်အလင်းရောင်တစ်ခုပဲ ဖြစ်ပါတယ်။
